De Exkursion güng los Kl. 12.00 mit en plattdüütsch Föhren dörch dat Europääsche Hansemuseum. Mit en Fohrstohl geiht dat daal na de Geschich vun de Stadt Lübeck. Bi den Bu vun dat Hansemuseum sünd se op ole Muern stött, de se gliek mit inbunnen hebbt in de Utstellen. Se staht för en Tiet, in de Lübeck dat Zentrum weer vun den Hannel in Noord- un Oostsee. Gliek in een vun de eersten Rüüm kunnen de Deelnehmers sik den Nabu vun en Schipp ankieken, mit dat de eersten Kooplüüd in´t 12. Johrhunnert loosseilt sünd na Russland. Dat weer ok de Anfang vun de grote Tiet vun´t Plattdüütsche: Middelnedderdüütsch is Verkehrsspraak ween twüschen London, Bergen, Visby un Novgorod. "Dat Hansemuseum kunn sodennig en echten Tempel ween för uns Spraak", sää Jan Graf vun´n Heimatbund un beduer, dat de Tafels Verklorens in Düütsch, Russisch, Sweedsch un Ingelsch anbeedt, man nich in de egen Spraak vun de Hanse: Platt.
Opstunns warrt dor fix ümbuut, so dat enige Utstellens - to´n Bispill to de Pest oder den Stalhoff in London - nich to bekieken weren. Na en lüttje Paus in de Cafeteria vun´t Museum güng dat denn an Boord vun de MS "Holstentor" mit Reederee Quandt eenmal dör de Havens un Kanaals rund de Ooltstadt vun Lübeck mit all ehr Karktöörn. Kl. 15.00 weer de Exkursion denn to Enn. Ünner dat Motto "Plattdüütschen Familiendag" stellt Heimatbund un ADS Grenzfriedensbund vun Tiet to Tiet en Veranstalten op de Been un wiest so hen op dat Plattdüütsche as Spraak, de geern in de Familie wiedergeven warrn schall. De Achtergrund: Kinner hebbt goot, wenn se mit mehr Spraken opwasst. Se finnt lichter Togang, wenn dat later in´t Leven dorüm geiht, dat se noch mehr anner Spraken lehren schüllt. "Platt maakt fit för de Welt un blifft to glieke Tiet Heimat", so Graf.